ভৱানীপুৰৰ কৃত্ৰিম বানক লৈ বজালী মহকুমাধিপতিৰ কাৰ্যালয়ৰ সভাকক্ষত বৈঠক

  গণ বাৰ্তা বিশেষ,পল্লাৰপাৰ,১৫ ডিচেম্বৰ:  বজালী মহকুমাৰ অন্তৰ্গত সৰুপেটা ৰাজহ চক্ৰৰ অধীনৰ শুকমানাহ,মাজগাঁৱ,অনন্দপুৰ,ধুপা লপাৰা,গলিয়া, পূৰ্ব ...

 

গণ বাৰ্তা বিশেষ,পল্লাৰপাৰ,১৫ ডিচেম্বৰ: বজালী মহকুমাৰ অন্তৰ্গত সৰুপেটা ৰাজহ চক্ৰৰ অধীনৰ শুকমানাহ,মাজগাঁৱ,অনন্দপুৰ,ধুপালপাৰা,গলিয়া, পূৰ্ব লুৱাশুৰ আদিকৰি বৃহত্তৰ পশ্চিম ভৱানীপুৰ অঞ্চলটো এটা সম্পূৰ্ণ কৃষি প্ৰধান অঞ্চল। ইয়াৰ প্ৰায় ৮৫ শতাংশ লোক কৃষিৰ ওপৰত নিৰ্ভৰশীল। যদিও বিগত প্ৰায় দুটা দশক ধৰি এই অঞ্চলৰ কৃষিজীৱি ৰাইজে ৰাষ্ট্ৰীয় ঘাইপথৰ কালভাৰ্ট,দলং তথা আভাৱনীয় ভাৱে বৃদ্ধি পোৱা মানুহৰ পুখুৰীৰ বাবে কৃত্ৰিম বানপানীৰ প্ৰৱল সমস্যাত ভুগি আছে। যাৰ ফলত মানুহৰ ঘৰ-বাৰীত পানী সোমোৱাৰ লগতে খেতিয়ক সকলে ঋতুকালীন কোনো ফচলে উৎপাদ কৰিব নোৱাৰে। সেয়া লাগিলে ধান খেতিয়ে হওক,মাহ জাতীয়,পাচলি ইত্যাদি কোনো ধৰণৰ খেতিয়ে ভালদৰে কৰিব নোৱাৰে চহা কৃষক সকলে। সেই জমা হৈ থকা পানী নিষ্কাশনৰ ব্যৱস্থাৰ বাবেপশ্চিম ভৱানীপুৰ সচেতন নাগৰিক সমাজৰ উদ্যোগত যোৱা ৬ অক্টোবৰত কুজাৰপীঠ ৰাষ্ট্ৰীয় ঘাইপথৰ কাষত গনতান্ত্ৰিকভাৱে এক অৱস্থান ধৰ্মঘট কাৰ্যসূচী ৰূপায়ন কৰাৰ সিদ্ধান্ত গ্ৰহন কৰিছিল। যদিও বজালী মহকুমাধিপতি কাৰ্যালয়ৰ পৰা সেই আন্দোলনৰ কাৰ্যসূচী স্থগিত ৰাখিবলৈ আহ্বান জনাইছিল আৰু আলোচনাৰ মজিয়ালৈ আমন্ত্ৰণ জনাইছিল। সেই মৰ্মে আজি বজালী মহকুমাধিপতিৰ কাৰ্যালয়ৰ সভাকক্ষত উক্ত বিষয় সন্দৰ্ভত এক গুৰুত্বপূৰ্ণ বৈঠক অনুষ্ঠিত হয়।

বৈঠকত উপস্থিত থাকে মহকুমাধিপতি নয়নজ্যোতি ভাগৱতী,সৰুপেটা ৰাজহ চক্ৰৰ চক্ৰ বিষয়া প্ৰাঞ্জল কোৱৰ, লাট মণ্ডল নৱ চৌধুৰী, ২৬ নং নিজ ভৱানীপুৰ জিলা পৰিষদৰ সদস্যা ৰাসিনা সৰকাৰ, বজালী জিলা আমছুৰ উপ সভাপতি আমিনুৰ ৰহমান, সাংবাদিক শ্বফিকুল ইছলাম, শুকমানাহ গাঁৱৰ গাঁওবুঢ়া ৰেজ্জাক আলী, দক্ষিণহাটী গাৱৰ গাঁওবুঢ়া গগেন দাসৰ লগতে পশ্চিম ভৱানীপুৰৰ কেইবাজনো সচেতন খেতিয়ক উপস্থিত থাকি  জলন্ত সমস্যাটো বিজ্ঞান সন্মত সমাধানৰ ক্ষেত্ৰত   সকলোৱে পৰামৰ্শমূলক বক্তব্য দাঙি ধৰে।  বৈঠকৰ অন্তত মহকুমাধিপতি নয়নজ্যোতি ভাগৱতীয়ে সমস্যাটো সম্পৰ্কে ইতিবাচক সহাৰি দিয়ে আৰু কয় সমস্যাটো থুল-মূল ভাৱে সমাধান কৰিলে ন'হব, চলিত ডিচেম্বৰ মাহৰ শেষৰ ভাগত চৰকাৰী বিভিন্ন বিভাগৰ বিশেষজ্ঞ সকলক লগত লৈ আমি আটাইয়ে পুনৰ আলোচনাত মিলিত হৈ ইয়াৰ এক স্থায়ী সমাধান উলিয়াব লাগিব এই বুলি আশ্বাস প্ৰদান কৰে মহকুমাধিপতি গৰাকীয়ে।