Page Nav

HIDE

জুৰীয়াত সংখ্যালঘু সংগ্ৰাম পৰিষদৰ শপত গ্ৰহণ অনুষ্ঠানত, “কা” আইন বলবৎ কৰা মুখ্যমন্ত্ৰী সোনোৱালক সময়ত অসমৰ ৰাইজে উচিত প্ৰত্যুত্তৰ দিবঃ মহম্মদ আলী খলিফা

সমাজ পৰিবৰ্তনৰ বাবে বৌদ্ধিক আন্দোলন গঢ়ি তুলিব লাগিব ঃ ছাহজাহান তালুকদাৰ ষ্টাফ ৰিপ’ৰ্টাৰ, নগাঁও, গণ বাৰ্তা, জুৰীয়া, ১১ অক্টোবৰ ঃ ‘গৰাখহনীয়াগ্...

সমাজ পৰিবৰ্তনৰ বাবে বৌদ্ধিক আন্দোলন গঢ়ি তুলিব লাগিব ঃ ছাহজাহান তালুকদাৰ


ষ্টাফ ৰিপ’ৰ্টাৰ, নগাঁও, গণ বাৰ্তা, জুৰীয়া, ১১ অক্টোবৰ ঃ ‘গৰাখহনীয়াগ্ৰস্ত সংখ্যালঘু শ্ৰমজীৱী লোক পেটৰ তাড়নাত যেতিয়াই কাম কৰিবলৈ অসমৰ  ইমূৰৰ পৰা সিমূৰলৈ গৈছে, তেতিয়াই বিভিন্ন সময়ত নাগৰিকত্বৰ নামত নানা হাৰাশাস্তিৰ সন্মুখীন হৈছে। এই ক্ষেত্ৰত চৰকাৰ-প্ৰশাসনে ৰহস্যজনকভাৱে নীৰৱতা অৱলম্বন কৰিছে।’- এই মন্তব্য সদৌ অসম সংখ্যালঘু সংগ্ৰাম পৰিষদৰ কেন্দ্ৰীয় সভাপতি মহম্মদ আলী খলিফাৰ। আজি নগাঁও জিলাৰ জুৰীয়াত সংগঠনটোৰ জিলা সমিতিৰ উদ্যোগত অনুষ্ঠিত ১৪খন নতুনকৈ গঠিত আঞ্চলিক সমিতিৰ শপত গ্ৰহণ অনুষ্ঠানত এইদৰে মন্তব্য কৰি মহম্মদ আলী খলিফাই কয়, সবকা সাথ সবকা বিকাশৰ কথা কোৱা সৰ্বানন্দ সোণোৱাল নেতৃত্বাধীন চৰকাৰৰ দিনত ৰাজ্যৰ এক তৃতীয়াংশ জনসংখ্যা থকা সংখ্যালঘু জনগোষ্ঠীৰ লোক প্ৰতাৰিত হৈছে। কাৰণ ৰাজ্যৰ বিভিন্ন প্ৰান্তত ভূমিহীন লোকক ভূমিপট্টা প্ৰদান কৰিছে যদিও সংখ্যালঘু জনগোষ্ঠীৰ লোকক ভূমি পট্টা দিয়াটো দূৰৈৰ কথা, বহু ঠাইৰ পৰা তেওঁলোকক ষড়যন্ত্ৰমূলকভাৱে উচ্ছেদ কৰিছে। এইদৰে অসমৰ এটা জনগোষ্ঠীক অসন্তুষ্ট কৰি বাকীসকলক সন্তুষ্ট কৰি নিৰ্বাচনী বৈতৰণী পাৰ কৰাৰ কৌশল ৰচনা কৰিছে বুলি তেওঁ অভিযোগ কৰে।

 খলিফাই ‘কা’ আইন বলৱৎ কৰি হিন্দু বাংলাদেশীক অসমত সংস্থাপন কৰা মুখ্যমন্ত্ৰী সৰ্বানন্দ সোণোৱালক অসমীয়া ৰাইজে সময়ত উচিত প্ৰত্যুত্তৰ দিব বুলি মন্তব্য কৰে। সভাপতি খলিফাই ভাষণ প্ৰসংগত ৰাজ্য চৰকাৰে মাদ্ৰাছা শিক্ষানুষ্ঠানসমূহ বন্ধ কৰাৰ তীব্ৰ বিৰোধিতা কৰে। এই কাৰ্য কৰি এটা জনগোষ্ঠীৰ লোকৰ মনত আঘাত নিদিবলৈ শিক্ষামন্ত্ৰী ড০ হিমন্ত বিশ্ব শৰ্মাৰ প্ৰতি কাতৰ আহ্বান জনায়।

 সংগ্ৰাম পৰিষদৰ জিলা সমিতিৰ সভাপতি এহিয়া হাচান আনচাৰীৰ সভাপতিত্বত অনুষ্ঠিত সভাত ‘দৈনিক গণ অধিকাৰ’ কাকতৰ সঞ্চালক ছাহজাহান তালুকদাৰে কয়, সমাজ পৰিৱৰ্তনৰ কাৰণে শিক্ষাৰ প্ৰয়োজন। যেতিয়াই এখন সমাজ সম্পূৰ্ণৰূপে শিক্ষিত হৈ উঠিব, তেতিয়াই সমাজৰ পৰা কু-প্ৰথাবোৰ আপোনা-আপুনি দূৰ হৈ যাব। সেয়ে তেওঁ সমাজ পৰিৱৰ্তনৰ ভাবে বৌদ্ধিক আন্দোলন গঢ়ি তুলিবলৈ আহ্বান জনাই কয়, সমাজৰ সকলো শ্ৰেণীৰ লোক শিক্ষিত হ’লে সেইখন সমাজ উন্নয়নৰ দিশত আগবাঢ়ি যোৱাত কোনেও বাধা দি ৰাখিব নোৱাৰে। 

তালুকদাৰে সমাজ উন্নয়নত সংবাদ মাধ্যমৰ ভূমিকা প্ৰসংগত লগতে কয়, মিডিয়াই এখন সমাজ বা জাতিৰ অতন্দ্ৰ প্ৰহৰীৰ দৰে কাম কৰে। সমাজৰ পৰা দুৰ্নীতি-অনিয়মবোৰ দূৰ কৰাত ই সহায় কৰে। সংখ্যালঘুসকল অতিকৈ পিছপৰা শ্ৰেণীৰ লোক বুলি উল্লেখ কৰি তেওঁ কয়, এই জনগোষ্ঠীয় লোকৰ সমস্যা বেছি। শিক্ষাৰ অভাৱ, সহজ- সৰলতাৰ পূৰ্ণ সুযোগ গ্ৰহণ কৰি কাম বিচাৰি উজনিলৈ যোৱা এই শ্ৰমজীৱী জনগোষ্ঠীৰ লোকক এচাম উগ্ৰ হিন্দুত্ববাদী নেতাই বাংলাদেশীৰ লেবেল লগাই বহু হাৰাশাস্তি কৰি আহিছে বুলি তালুকদাৰে মন্তব্য কৰে। উক্ত সভাত সংগঠনটোৰ কেন্দ্ৰীয় উপ-সভাপতি তথা অধিবক্তা মহম্মদ আলী, কেন্দ্ৰীয় সম্পাদক আবু বক্কৰ ছিদ্দিক, মুখ্য সাংগঠনিক সম্পাদক জাকিৰ হুছেইন আদিয়েও ভাষণ দিয়ে। 

ইয়াৰ পূৰ্বে সংখ্যালঘু সংগ্ৰাম পৰিষদৰ ১৪টা নতুন আঞ্চলিক সমিতি ক্ৰমে জুৰীয়া, ৰূপহী, কছাৰীগাঁও, মাহেৰীপাৰ, ধিংবৰি চাপৰি, গড়াজান, ফুৰআনাটি, বৰালিমাৰী, চতিয়ন, কেন্দ্ৰগুৰি, হেৰাপতি, পশ্চিম ধিংবৰি চাপৰি, কান্দুলিমাৰী, বগুৰিগুৰি আদি আঞ্চলিক সমিতিকশপতবাক্য পাঠ কৰোৱা হয়। সভাৰ আৰম্ভণিতে সংগঠনটোৰ প্ৰতিষ্ঠাপক সভাপতি প্ৰয়াত নজিৰ উদ্দিন আহমেদৰ বিদেহ আত্মাৰ সদ্‌গতি কামনা কৰি এক মিনিট মৌন প্ৰাৰ্থনা কৰা হয়। সভাৰ শেষত সদৌ অসম মাদ্ৰাছা ছাত্ৰ সন্থাৰ প্ৰাক্তন সভাপতি বাহাৰুল ইছলামে আনুষ্ঠানিকভাবে সংগ্ৰাম পৰিষদত যোগদান কৰে।